चितवन, २३ फागुन ०८० । संकटमा परेको औषधि उद्योगलाई उकास्ने र प्रवर्धन गर्ने उद्धेश्यसहित भरतपुरमा नवौं फर्मा एक्स्पो गर्न लागिएको छ । औषधि उत्पादक संघ (एपोन)ले यही फागुन २५ देखि चितवन प्रर्दशनी केन्द्र, भरतपुरमा नवौं फर्मा एक्स्पो गर्ने जानकारी दिएको छ ।

्औषधि उत्पादक संघले बुधबार भरतपुरमा पत्रकार सम्मेलन गरी एक्स्पोको तयारी अन्तिम चरणमा पुगेको जानकारी दिएको छ । पत्रकार सम्मेलनमा एपोनका अध्यक्ष महेश प्रधानले धराशयी बन्दै गएको नेपाली औषधि उद्योगलाई चिनाउन फर्मा एक्स्पो गर्न लागिएको बताए । ‘हामी अहिले ८४ वटा उद्योग भएर पनि पूर्ण क्षमतामा चलाउन सकेका छैनौँ’ उनले भने, यसको गुणस्तरीयता र प्रभावकारिता बारे जानकारी दिन पनि एक्स्पो गर्न लागेका हौं ।

नेपालीऔषधि उद्योग गुणस्तरीय भएपनि सबैको पहुंँचमा नपुगेको उनले बताए । ‘हामीले डब्लुएचओको मापदण्डमा औषधि उत्पादन गरेका छौँ, तर सरकारले साथ नदिंँदा हामी पछाडि परे जस्तो भएका छौं’ उनले भने ।

त्यस अवसरमा एपोनका वरिष्ठ उपाध्यक्ष प्रदीप रुगंटाले एक्स्पोको तयारी अन्तिम चरणमा पुगेको र प्रदर्शकहरु आउने क्रम रहेको बताए । ‘हाम्रो भोलिबाटनै प्राविधिक, बजार प्रतिनिधिसंँग टेक्निकल सेसन राखेका छौं’, उनले भने, यसले नेपाली औषधिका बारे थप ज्ञान साटासाट हुने अपेक्षा गरेका छौं ।

देशकै केन्द्रबिन्दु चितवन रहेकोले यहाँ यसको तेस्रो संस्करण गर्न लागिएको उनको भनाई छ । एपोनका महासचिव सुदर्शन खेगुलीले नेपाली औषधि उद्योगको अवस्था खस्किदै गईरहेको जानकारी दिँदै एक्स्पोबाट नेपाली औषधि उद्योग बजार विस्तार हुने अपेक्षा गरे । ‘सयभन्दा बढी औषधि उद्योग दर्ता छन । तर ८० देखि ८५ वटा औषधि उद्योग मात्र सञ्चालनमा छन् । त्यो पनि आधा क्षमतामा’ उनले भने, ‘यसको गुणस्तर र प्रभावकारिताबारे जानकारी दिंँदा निर्यात गर्न पनि टेवा पुग्नेछ ।’ नेपाली औषधिको प्रभावकारिता विदेशीको तुलनामा कम नभएको भन्दै उनले सरकारले पनि नेपाली औषधि प्रयोग गर्नुपर्नेमा जोड दिए ।

एपोनका उपाध्यक्ष एवं मिडिया संयोजक सन्तोष बरालले एक्स्पोमा विदेशी प्रदर्शक र प्रतिनिधि पनि आउने जानकारी दिए । उनका अनुसार यो एक्स्पोमा भारत, सिंगापुर बंगलादेश, अमेरिका, जर्मन, चीन लगायत नौवटा देशबाट प्रतिनिधिहरु आउनेछन् । ‘हामीले एक्स्पोमा औषधिको उत्पादन डेमो पनि प्रर्दशन गर्नेछौं’ उनले भने, ‘यसले हाम्रा उत्पादन निर्यात गर्न मद्दत मिल्नेछ ।’