हरिश्चन्द्र बाग कञ्चनपुर । दुई वर्षदेखि हमासको कब्जामा रहेका भनिएका नेपाली विद्यार्थी कञ्चनपुरका विपिन जोशीको अवस्था अहिलेसम्म अज्ञात छ । बन्धकहरू रिहाइ हुने क्रममा आज बिहान इजरायली सेनाले विपिनको परिवारलाई सम्पर्क गर्दै विपिन जोशी जीवित बन्धकको सूचीमा नरहेको जानकारी गराएको छ । विपिनको रिहाइकै लागि अन्तर्राष्ट्रियस्तरमा दबाब बढाउन तीन साताअघि अमेरिका पुगेका विपिनकि आमा पद्मा जोशी र बहिनी पुष्पा जोशी अहिले पनि विपिनको सकुशल रिहाइको लागि विभिन्न निकायसँग भेटघाटमा हुनुहुन्छ । कञ्चनपुरमा रहनु भएका विपिनका दाजु किशोर कुमार जोशीले रेडियो नेपालसँग कुरा गर्दै इजरायलले सुनाएको खबरले विपिनको रिहाइको प्रतीक्षामा रहेका परिवार र आम नेपाली तथा शुभचिन्तकहरूलाई दुखित बनाएको प्रतिक्रिया दिनुभयो । यद्यपि परिवार अझैसम्म पनि विपिन सकुशल रहेकोमा आशावादी छ । अज्ञात अवस्थाले खुसी हुन नदिए पनि अझै पर्खाइमा रहन बाध्य पारेको उहाँको भनाइ छ । दुई वर्ष लामो समयसम्म विपिनको सकुशल रिहाइको प्रतीक्षामा बसेको जोशी परिवार अझै विपिनको रिहाइको पर्खाइमा छ ।
विपिनको अवस्था पत्ता लगाई सार्वजनिक गर्न जोशी परिवारले इजरायल, हमास, मध्यस्थता गरिरहेका राष्ट्रहरू र अन्तर्राष्ट्रिय निकायहरूलाई अनुरोध गरेको छ । रेडियोनेपालअनलाइनडटकमबाट
