काठमाडौँ, २८ वैशाख (०७८) । निकै प्रतिष्पर्धात्मक खेलमा काठमाडौँ रेजर्सलाई २–१ गोलको अन्तरले पराजित गर्दै धनगढी एफसी काठमाडौँमा जारी नेपाल सुपर लिगको फाइनलमा प्रवेश गरेको छ । दशरथ रङ्गशालामा आज साँझ भएको खेलमा शुरुमा एक गोलले पछाडि परेको अवस्थालाई उल्टाउँदै धनगढी एफसीले रोमाञ्चक जित निकालेको हो ।

काठमाडौँका लागि तेज तामाङले खेलको ७५औँ मिनेटमा गोल गरेका थिए । तर त्यसको तीन मिनेटमै धनगढीका लागि पुजन उपरकोटीले बराबरी गोली फर्काएका थिए ।

खेलको निर्धारित ९० मिनेटको समय बराबरीमा टुङ्गिएपछि थप गरेको समयको एक सय आठौँ मिनेटमा धनगढीका विशाल राईले टीमका लागि बिजयी गोल गरेका थिए । काठमाडौँ रेजर्सले बुधबार हुने बुटवल लुम्बिनी एफसी र ललितपुर सिटी एफसीबीचको बिजेतासँग फाइनल प्रवेशका लागि दोस्रो प्लेअफमा खेल्ने छ ।