काठमाडौँ, १३ वैशाख ०७९ । स्थानीय तह निर्वाचनका लागि एक लाख ४१ हजार चार सय ६८ जनाको मनोनयन दर्ता भएको छ । निर्वाचन आयोगले मंगलबार बिहान साढे १० बजे सार्वजनिक गरेको तथ्याङ्कअनुसार प्रदेश नं १ मा २२ हजार एक सय ९४, मधेसमा ३६ हजार दुई सय ७५, बागमतीमा २३ हजार छ सय ५४, गण्डकीमा १२ हजार तीन सय १४, लुम्बिनी २२ हजार चार सय २१, कर्णालीमा १२ हजार आठ सय ४८ र सुदूरपश्चिम प्रदेशमा ११ हजार सात सय ६२ जनाको उम्मेदवारी परेको छ ।

नगरपालिकाको प्रमुखमा तीन हजार तीन सय १८ र उपप्रमुखमा दुई हजार ३६ को उम्मेदवारी दर्ता भएको छ । गाउँपालिका अध्यक्षमा तीन हजार तीन सय छ, उपाध्यक्षमा दुई हजार तीन सय ४३ र वडाध्यक्षमा ३३ हजार एक सय ११ को मनोयन दर्ता भएको छ । २४ हजारदुई सय ८३ महिला सदस्य, २१ हजार नौ सय ७९ महिला दलित सदस्य र ५१ हजार ९२ सदस्यको मनोनयन दर्ता भएको छ ।

सात सय ५३ स्थानीय तहका प्रमुख, उपप्रमुख, अध्यक्ष र उपाध्यक्ष, छ हजार सात सय ४३ वडाध्यक्ष, सोही संख्यामा महिला सदस्य र दलित महिला सदस्य तथा १३ हजार चार सय ८३ सदस्य गरी कुल ३५ हजार दुइ सय २१ सदस्यका लागि यही वैशाख ३० गते निर्वाचन हुँदैछ ।

आइतबार र सोमबार देशभरका स्थानीय तहमा स्थापना भएका निर्वाचन अधिकृतको कार्यालयमा उत्साहपूर्णरुपमा मनोनयन दर्ता भएका थिए । मंगलबार उम्मेदवारको विरोधमा उजुरी लिने कार्यतालिका छ । वैशाख १४ र १५ गते मनोयनपत्र जाँच तथा उजुरीमाथि जाँचबुझ र निर्णय दिने, वैशाख १५ गते मनोनयन भएका उम्मेदवारको नामावली प्रकाशन तथा वैशाख १६ गते उम्मेदवारको नाम फिर्ता तथा उम्मेदारको अन्तिम नामावली प्रकाशन गर्ने कार्यतालिका छ ।