चितवन, १५ वैशाख (०७८) । कोरोना भाइरस (कोभिड–१९) संक्रमितको संख्या बढ्दै गएपछि चितवनमा निषेधाज्ञा गर्ने निर्णय गरिएको छ । आज बसेको जिल्ला कोभिड १९ संकट व्यवस्थापन समिति (डिसीएमसी) चितवनको बैठकले बैैशाख १६ गते बिहीबार रातिदेखि १५ दिनसम्म निषेधाज्ञा गर्ने निर्णय गरेको हो । भोली बिहीबार राति १२ बजेदेखि ३१ गते राती १२ बजेसम्मका लागि यो निर्णय लागु हुनेछ ।

चितवनमा कोरोना संक्रमितको संख्या ५ सय नाघेपछि निषेधाज्ञा गर्ने निर्णय गरिएको जिल्ला क्राइसिस म्यानेजमेन्ट सेन्टर (डिसीएमसी) चितवनका संयोजक एवं प्रमुख जिल्ला अधिकारी प्रेमलाल लामिछानेले जानकारी दिनुभयो ।

चितवनमा आजसम्म कोरोना भाइरसका सक्रिय संक्रमितको संख्या ५ सय ८५ पुगेको छ । पछिल्लो २४ घण्टामा थप १ सय ३४ जना कोरोना संक्रमित थपिएसंगै कुल सक्रिय संक्रमितको संख्या ५ सय ८५ पुगेको जिल्ला स्वास्थ्य कार्यालय चितवनले जनाएको छ । पछिल्लो २४ घण्टामा थपिएका संक्रमित मध्ये भरतपुर महानगरपालिकाका मात्रै १ सय ३ जना रहेका छन् । यस्तै रत्ननगर नगरपालिकाका २० जना, खैरहनी नगरपालिकाका ६ जना, माडी नगरपालिका २ जना, राप्ती, कालिका र इच्छाकामनाका एक्एक जना संक्रमित थपिएका छन् । काठमाडौंमा पनि बिहीबारदेखि निषेधाज्ञा लागु हुँदैछ ।